المطلوب :
1- ماركا دا بولو ( طابع الدمغة )
2- نسخة من الاوراق الشخصية : البرميسو و الكوديتش و الكارتا و الباسبور
3- صورة باسبور الشخص اللي هتعمل له ضم
السكن :
ا) شهادة إيدونيتا ألودحيتيفا أصلية ( ملحوظة : لو بتعمل ضم لشخص أقل من 14 عام مش بتحتاج الشهادة و انما بتملا موديل S1 اللي هو انك بتستضيف الشخص دا )
ب) صورة من عقد السكن ( المتسجل في الكمونة مش مجرد عقد بدون تسجيل )
الشغل :
ا) بالنسبة للعامل العادي :
– أخر كود : لو هتعمل لفرد واحد بس يبقى الكود أعلى من 8.737
لو فردين يبقى الكود أعلى من 11.650
لو 3 أفرد يبقى الكود أعلى من 14.562
– عقد العمل و موديل الاونيلاف اللي صاحب الشغل بيملاه وقت أما يأمن عليك
– أخر بوستا باجا
– صورة بطاقة صاحب العمل
– موديل S3 يملاه صاحب الشغل . أو تملاه انت و تخلي صاحب الشغل يوقع عليه
ب) بالنسبة للأرتيجانو او صاحب شركة :
– فيزورا كاميرالي أو شهادة التسجيل في الكاميرا كوميرشو
– صورة البرتيتا إيفا
– موديل أونيكو أو بيلانشو
لو إنت شغال بس مفيش سكن تعمل ايه ؟
ممكن تستعين بصديق يعملك الايدونيتا ألودجيتيفا بس طبعا دا حل صعب و بيحصل فيه نصب كتير . من وجهة نظرنا أفضل إنك فعلا تأجر سكن في منطقة خارج المدينة عشان يكون سعرها قليل , تعمل عليها الريزيدنسا و اجراءات الضم ,و تشوف ناس تسكن معاك لحد أما يخلص ورق الضم العائلي.
لو انت عندك السكن بس الدخل مش كافي تعمل ايه ؟
ممكن تشوف محاسب كويس يعمل لك أونيكو بمبلغ معين و بتدفع عليه ضرايب . الضرايب بتكون تقريبا ألف على كل خمسة ألاف .
الخطوات :
إما انك تروح لمكتب سيندكاتو يملاه او تملاه انت و تبعته على النت بس طبعا يكون عندك ايميل و مسجل على موقع الداخلية . التسجيل دا سهل جدا مش بيحتاج غير ايميل و تكتب بياناتك صح . …
و انت بتعمل الطلب لازم تتأكد ان البيانات كلها سليمة , لو في حاجه غلط الورق هيتأخر . حاول تحفظ نسخة من الطلب على الكمبيوتر او تطبع صورة منه و تحتفظ بها
بعد أما تقدم على الضم بتستنى لحد أما يبعتوا ليك النولا أوستا , اللي انت بتبعتها بعد كدا للزوجة
برضوا أما تطلع النولا اوستا تحتفظ بصورة معاك او تعمل لها سكان و تخفظها على الكمبيوتر
بالنسبة للاجراءات اللي زوجة بتعملها في مصر :
– أما تطلع النولا أوستا تاخدي ميعاد لتوثيق الورق , و ميعاد تاني بعده بشهر لاخذ الفيزا
– تعمل قسيمة الزواج و القيد العائلي و شهادة ميلاد كمبيوتر لكل فرد من اللي اتعمل ليهم الضم
– توثق الاوراق دي في الخارجية
– تترجم الاوراق دي من مكتب معتمد للقنصلية الايطالية
– توثق الاوراق دي في القنصلية الايطالية
– تحددي ميعاد في القنصلية و تاخديها مع الجوازات و الصور الشخصية عشان تاخدي الفيزا
– الاوراق المترجمة و موثقة دي زي قسيمة الزواج احتفظ بصورة منها عشان بتحتاجها في إلكمونة بعد كدا و في استلام الاقامة
ملحوظة هامة
إحتفظ بجميع الاوراق . و أول ما الزوجة توصل بتروحوا البريفتورا على طول تاني يوم , هيدوك ميعاد و ورقة فيها الاوراق المطلوبة . تجهز الاوراق و تروح في الميعاد تاخد الظرف و تبعته في البوسطة و يبقى كدا قدمتوا ع البرميسو .
ليست هناك تعليقات:
إرسال تعليق